![](https://www.islamprizren.com/kbiprizren/wp-content/uploads/2024/07/12_07_2024_02-1024x681.jpg)
KBI-Prizren, 12 korrik 2024
_____________
Gjatë vitit shkollor 2023/2024:
-379 nxënës e mbaruan Nivelin e Parë të Mektebit;
-94 nxënës i mbaruan tri nivelet e Mektebit dhe Diplomuan – Hatme Kur’anin.
_____________
Dje, më datë 11 korrik 2024 (e enjte), në kompleksin e Lidhjes së Prizrenit, aty te ish-medreseja e Gazi Mehmet Pashës, Këshilli i Bashkësisë Islame i Prizrenit, me një Program solemn e me prezencë madhështore të nxënësve, e përmbylli vitin shkollor në Mekteb 2023/2024.
Ishte një vit i suksesshëm me rezultate tepër të mira, falë angazhimit të madh e përkushtimit të sinqertë të imamëve e mualimëve.
Këtyre u takon mirënjohja e falënderimi, së bashku me prindërit që i dhanë përkrahje fëmijëve.
Ky do të jetë edhe tregimi më i mirë i jetës së tyre…
Mirënjohje po aq u takon edhe bamirësave që e kanë ndihmuar me kontributet e tyre Mektebin gjatë këtij viti shkollor, duke mundësuar funksionim normal.
Në fjalën e tij para të pranishmëve, kryetari i KBI-Prizren, Valon ef. Ibrahimi, i falënderoi imamët, mualimët dhe prindërit për sukseset e arritura. Një falënderim ndaj tyre e bëri edhe kryeimami dr. Orhan ef. Bislimaj, i cili ofroi sqarime edhe për sfidat gjatë vitit shkollor .
Nxënësit, performuan pika artistike, recitale e lojëra. Ishte mbresëlënëse, drama ‘Myderriz Ymer Prizreni’, sidomos për mesazhin drejtuar të rinjëve, ku në fund të saj u lexua një ‘Fatiha’, për shpirtin e tij dhe të gjithë dëshmorëve.
Përveç çertifikatave që u ndanë për nxënësit e Nivelit të Parë, sivjet u ndanë edhe mirënjohjet për nxënësit e dalluar në çdo mekteb, e të cilët kanë qenë më të rregullt në orët mësimore.
Po ashtu, sivjet, KBI-Prizren ndau mirënjohjen ‘Mualim i Dalluar’ dhe ‘Mualime e Dalluar’, pra një nga radha e imamëve dhe një nga radha e mualimeve:
– Arif ef. Memedaj, iu nda mirënjohja ‘Mualim i Dalluar’, nga radha e imamëve – imam në xhaminë Medina; dhe
– Mërgime Kalanderi, iu nda mirënjohja ‘Mualime e Dalluar’, nga radha e mualimeve – koordinatore e Departamentit të Gruas, Prizren.
Në fund, pati dhurata për nxënësit, nga bamirësit e Prizrenit nëpërmjet shoqatës ‘Bereqeti’, dega në Prizren.
Urime të gjithëve, prindërve, imamëve e mualimeve. Mbi të gjitha shumë urime nxënësve, e me pushime të mira verore!
Viti i ri shkollor 2024/2025, fillon në shtator dhe për këtë do të bëhen lajmërimet me kohë!